Activitats Val d’Aran e entorns
Trobaratz mès informacion generau entà activitats ena Val d’Aran: http://torisme.aran.org

SENDERISME
Era Val d’Aran ei plaçada entre dus camins de gran recorrut transpirenenc, eth GR11, que passe peth vessant catalan e eth sud d’Aran, e eth GR10 que passe per França. Açò permet conéisher tota era Val d’Aran e enlaçar es dus camins transpirenencs. I a rotes de nauta montanha mès tanben itineraris entà familhes que vòlen hèr excursions que non supausen cap de risc e permeten ua agradiua jornada de senderisme en contacte damb era natura. Mès entà dauant se tròben tres exemples entà excursions ena Val d’Aran.

Recorrut: Porcingles, Canejan, Pontaut.
Temps aprox.: 2 ores
Dificultat: Baisha.
Desnivèu: 100
Descripcion: Era passejada per ua des vals mès sauvatges dera Val d’Aran, permet imaginar com passaue era vida en aguest lòc hè sonque quauqui ans. Aguest itinerari permet trasladar-se en temps en tot recórrer camins que s’utilizauen coma via principau deth contraband e des durs trabalhs enes mines de Liat. Eth magnific guardader qu’aufrís eth camin vielh de Porcingles en Canejan damb era Lana de Les, e era sarrada dera Maladeta ath hons, contraste damb es espessi bòsqui der ombrèr dera Val de Toran. Aguest recorrut transcor peth GR-211 damb es sues mèrques vermelhes e blanques. Hèm un picnic en guardader.

Recorrut: Vielha, Santa Gèmma, Vilac, Betlan, Vila, Aubèrt, Gausac, Vielha.
Temps aprox.: 3,30 ores damb guia e picnic (bocata e beguda)
Dificultat: Baisha.
Desnivèu: 200
Descripcion: Des de Vielha peth camin de Vilac se pòden anar descorbint quauqui des pòbles que formen eth terçon de Marcatosa. Ua visita pes petiti nuclèus dispèrsi dera comarca e un recorrut pes bòsqui propèrs tanben mos aufrissen era possibilitat de conéisher era legenda deth gigant Mandrònius. Diden es poblants qu’eth gigant viuec en Betlan, que lutèc contra es romans que envadiren era val enquia qu’en ua d’aguestes batalhes lo auciren e ath delà se ditz que se trapèc en Garòs ua esquelèta de tres mètres que poderie apertiéner a Mandrònius, un gigant deth quau se conde qu’ère ua bona persona. Camins entre prats e bòsqui damb vistes plan beròies. Picnic.

Recorrut: Beret, Montgarri, Beret
Temps aprox.: 3-4 ores damb guia e picnic (entrepan e beguda), Dificultat: Mieja.
Desnivèu: 200
Descripcion: Er itinerari prepausat ges deth Plan de Beret e en tot seguir eth cors deth riu Noguèra palharesa, trauèsse ua extensa zòna de peisheus de nauta montanha. A mesura que pèrd nautada, eth camin se cale en un bòsc de pin nere. Eth pas pera bòrda miei des.hèta d’Es de Cabau mos hè a pensar enes darrèrs poblants d’aguest endret, que se vederen obligadi a abandonar-la enes ans seishanta pr’amor des dures condicions de vida deth parçan. Era arribada en santuari de Montgarri ei d’ua beresa espectaculara. Plaçat entre prats e bòsqui, pròp deth tranquil Noguèra Palharesa, mos entornege ua calma absoluda. Se tròben dus refugis entà poder minjar e tanben pernoctar.

ROTA ROMANICA
Se tracte d’ua activitat culturau ena quau visitaram es glèises mès representatives deth Romanic ena Val d’Aran. A trauèrs de pòbles com Les e Bossòst en Baish Aran, Vielha en Miei Aran e Salardú e Tredòs en Naut Aran, coneisheram ua part plan representativa d’aguesta forma d’arquitectura tan presenta ena val. Ja de tornada, visitaram eth nuclèu zoologic d’Arties, a on poderam contemplar dus exemplars d’os brun, espècie que temps enlà viuie en Pirenèu e qu’actuaument ei protagonista d’un controvertit plan de repoblacion.

Tour: 4-5 ores

EXCURSION EN 4x4 TATH PARC NACIONAU DE SANT MAURICI AIGÜESTORTES E GLÈISES ROMANIQUES ENA VAL DE BOÍ
Aguesta rota ei compatibla damb senderisme en Parc nacionau d’Aigüestortes. Aguesta activitat comence ena poblacion de Boí, a on assistiram tara projeccion d’imatges e informacion sus era flòra e era fauna deth parc a cargue deth Servici d’Informacion deth madeish. Des d’aciu pujaram en veïculs 4x4 enquiath planhèth de Sant Esperit. Un viatge aquiu, haram ua rota a pè pes lòcs e endrets mès interessants com Estany llong, passant per Aigüestortes deth Plan de la Molina. Picnic ath cant deth lac (entrepan e beguda). Com ena Val d’Aran, ena Val de Boí tanben podem contemplar es glèises romaniques mès famoses deth Pirenèu: Sant Climent de Taüll e Santa Maria, andues patrimòni dera umanitat.

Tath parc, aprox. 3 ores, d’activitat en totau: Tot eth dia.

IPICA
Era Val d’Aran aufrís ues magnifiques possibilitats entà descorbir es sòns endrets a shivau acompanhadi per un monitor que mos amiarà pes camins. Activitat que consistís en hèr ua passejada a shivau per un circuit de nauta montanha, en tot gésser des dera Escòla d’Equitacion dera Val d’Aran en Vielha e trauessant ua drecèra de montanha damb meravilhoses vistes que mos amiarà entath guardader de Vilac. Es shivaus que s’emplèguen tad aguesta activitat son animaus docils, acostumadi ad aguest tipe d’excursions.

D’activitat en totau: 1-3 ores.

MOUNTAIN BIKING, BTT
Era practica dera bicicleta tot terren se desvolope per camins e pistes forestaus dera Val d’Aran seleccionades pera sua beresa e accessibilitat. Actuaument i a 7 itineraris damb mès de 100 Km., adaptadi ath BTT, variadi, abalizadi e classificadi sivans eth grad de dificultat. Un des 7 itineraris ei era Rota deth Camin reiau, antica via de comunicacion entre es diferenti pòbles deth hons dera val que cor parallèla ath riu Garona, en tot passar per bòsqui de ribèra e afluents deth Garona. Era sua arribentor ei suau, en tot èster idonèa entà iniciar-se e conéisher ath madeish temps pòbles tipics dera Val.

Mos trasladaram des deth nòste alotjament tath començament dera rota, a on eth monitor mos darà es instruccions de besonh entath desvolopament dera activitat. En èster basicament de descens, e damb ua durada aproximada de 2 ores, se convertís en ua plan bona rota entàs familhes.

2 ores, durada dera activitat en totau: mieja jornada.

Entà expèrts e aficionadi ath BTT aufrim ua rota damb un nivèu pro naut.
Recorrut: Bossòst, Mina Margalida, Bassa d’Arres, Arres de Sus e Arres de Jos, Benós, Arró, Era Bordeta, Pònt deth Lop, Pònt de Hèr, Bossòst.
Temps aprox.: De 5 a 6 ores.
Dificultat: Nauta
Desnivèu: 1000
Descripcion: Era excursion prepausada a eth punt de gessuda e arribada en Bossòst, e mos portarà a descorbir petiti poblets deth Terçon de Lairissa. Requerís un nivèu plan naut, autant fisic com tecnic, pr’amor deth fòrt desnivèu que cau superar (e eth mau ei ena pista de pujada tà Margalida), atau com es camins de baishada des d’Arres enquia Era Bordeta que requerissen un bon contròtle dera bicicleta. Se non s’ei molt aficionat as baishades tipe trial, se pòt hèr ua dusau opcion entà evitar-les, e des d’Arres se poderie baishar tà Bossòst per ua pista. Era part nauta der itinerari mos permeterà gaudir de plan beròies vistes sus eth Baish e Miei Aran atau coma dera Sarrada dera Maladeta, e trobaram un cornèr idillic entà descansar, com ei era Bassa d’Arres.

De 5 a 6 ores

+ informacion www.deportur.com

PESCA
Entàs aimants dera pesca, era Val d’Aran ei un autentic paradís, pera riquesa des sòns rius, embassaments e lacs de montanha a on se pòden practicar ua grana part des modalitats que formen aguest espòrt.

Eth pescaire a totes es facilitats deth mon tà practicar eth sòn espòrt, entà obtier eth permís diari de pesca enes establiments autorizadi, e ath delà, poderà minjar ath ser es trueites pescades, ja que quauqui otèls e restaurants aufrissen aguest servici as sòns clients.

Era pesca ena Val d’Aran ei totaument controtlada e regulada, tà pr’amor de qu’aguesta activitat non se massifique ne se capturen peishi que non complisquen es mesures minimes entà assegurar era supervivéncia e era sotenibilitat dera fauna deth riu.

RAFTING
Eth riu Garona possedís ues qualitats tecniques e ua beresa que lo hèn plan atractiu entà gaudir des espòrts d’aigua coma eth piragüisme, eth rafting, er idrospeed e devarades en canòa. Eth rafting, en creishenta expansion, se pòt practicar sense auer coneishements tecnics prèvis, damb ua condicion fisica normau, ja qu’era embarcacion ei dirigida per un guia professionau. Era seguretat ena devarada deth riu la garantís eth madeish guia e un equip de professionaus que hèn eth seguiment des embarcacions des deth començament enquiara fin deth recorrut. Entà practicar aguest espòrt ei de besonh combinar coneishements de natacion.

Eth tram deth Garona a on se desvolope era activitat ei:

Tram 1: LES-PÒNT DE REI
Aguest tram a uns 8 Km. aproximadament. Era gessuda ei dera centrau de Cledes, ath cant deth pòble de Les, enquiath Pònt de Rei, ena frontèra damb França. Ath començament d’aguest tram passaram sautant sus ondades, enquia ua zòna mès tranquilla que mos amiarà enquia un rapid plaçat en centre dera poblacion de Les. Dempús baisharam per un tobogan, en tot arribar enquia ua auta zòna d’ondades. Aguest recorrut ei mès senzilh qu’eth prumèr tram, encara qu’a era madeisha emocion e diuersitat.

1h 10 min. de baishada, Activitat en totau: mieja jornada.

Tram 2: ES BÒRDES-BOSSÒST
Aguest tram a uns 9Km. aproximadament. Era baishada passe per zònes de suaus rapids, sauts, tobogans e un magnific canon damb eth quau es gojats viueràn sensacions incomparables, enquia arribar en pòble de Bossòst, a on acabaràn eth recorrut.

1h 30min. de baishada, Activitat en totau: mieja jornada

+ informacion www.deportur.com

BARRANQUISME, CAYONING
Entà practicar aguest espòrt ei de besonh combinar coneishements de natacion. Polit barranc d’exuberanta vegetacion ideau entara iniciacion. Anaram caminant peth barranc deth riu Bausen internant-mos en un espés bòsc de beresa incomparabla. Despús dera aproximacion damb coche, ua petita passejada mos portarà tar inici deth descens, pendent eth quau mos trobaram damb diuèrsi sauts a potzi d’aigua, tobogans, descens damb còrdes, etc.

Pera sua durada (aproximadament 1.30h laguens deth barranc) e eth nivèu de dificultat des sòns passi, lo consideram eth barranc ideau entara iniciacion en mon deth barranquisme, accessible tanben as mès joeni (a compdar de 12 ans).

1h 30 min. en barranc, Activitat en totau: mieja jornada.

+ información www.altisportaventura.com


ESCALADA ESPORTIVA
Aguesta activitat consistís en escalar per ua paret verticau utilizant es nòsti pès e mans (esgarrapant), en tot èster en cada moment asseguradi per ua còrda.

Ròca Fronsac
Magnifica paret rocosa, plaçada en pòble fronterèr francés de Fronsac, a sonque 30 minutes de Vielha. Mès de 12 vies perfèctament equipades, damb longades de 10 mètres a 35 mètres e dificultats de III grad (pòc dificil - dificultat mieja) a VI grad (plan dificil).

Ròca Luishon
Gran blòc rocós ath cant deth Pòble balneari francés. Vint vies d’enquia 40 mètres e dificultats de III grad (pòc dificil - dificultat mieja).

Activitat en totau: mieja jornada.

+ informacion www.deportur.com

QUADS
Es Quads son veïculs de quate ròdes (entre mòto e tot terren): Son veïculs de facila conduccion. Despús d’ua brèu explicacion e demostracion dera sua conduccion e contròtle per part deth guia, quinsevolh participant serà capaç de méter a pròva era sua abilitat e adretia ena conduccion d’aguest. Eth pilòt aurà d’èster en possession deth permís de conduïr (b1) coches, antiquitat de 2 ans de carnet e presentar-lo abantes d’iniciar era activitat.

Activitat a desvolopar per pista forestau, damb gessuda des de Vielha trauessant diferenti camins emblematics dera Val d’Aran.

1 ora 30 minutes-2 ores.

+ informacion www.deportur.com

VISITA DERA MINA VICTÒRIA E DER ECOMUSÈU JOANCHIQUET
Era Val d’Aran a estat istoricament ua zòna d’extraccion de mineraus. Era mina Victòria, a ua nautada d’entre 1320 e 1590 mètres entre Arres e Bossòst, comencèc a foncionar er an 1912, entà obtier-ne zinc e plom. Siguec ua des mines mès importantes dera val enquiath cessament dera activitat en 1952. Ara, despús d’un dificil trabalh de recuperacion, se pòt realizar ua visita guidada.

Er Ecomusèu Joanchiquet en Vilamòs represente eth modèl dera casa tradicionau aranesa damb bòrdes e uart. Ua casa deth sègle dètz-e-sèt damb codina tradicionau, cerèr, humarau, mòbles e airines antics. Era visita guidada da ua idèa de coma se viuiec e trabalhèc en Aran pendent sègles.

Activitat en totau mieja jornada.